وكالة سوق عكاظ الدعاية و الإعلان

سوشيال ميديا ماركتنج.. إيه أول حاجة بتيجي في دماغك لما تسمع الكلمة دي؟

بوستات على فيسبوك و إنستاجرام؟ تصميم حلو؟ إعلانات ممولة أو Media Buying؟

هل دي فكرتك بس عن الموضوع؟ لو كدة يبقى إحنا محتاجين نتكلم عشان ال Social Media Marketing أكبر من كدة بكتير.

بص يا صديقي.. التسويق هو التسويق.. وهو جزئين.. أسلوب تفكير من عقلية المسوق.. و أدوات تحول أسلوب التفكير دة لوسيلة تواصل مؤثرة.. و عشان نفهم السوشيال ميديا ماركتنج و ليه هو مهم ليك و لشغلك.. فمحتاجين نرجع شوية كتييييييييييير.. جاهز؟

من أول ما البشرية بدأت تتاجر و تتخطى مرحلة الاكتفاء الذاتي لكل مجموعة فيها.. بدأت تظهر فكرة المنتجات.. و المنتجات دي بيتم عرضها في الأسواق على اختلاف بساطتها.

طب لو افترضنا إن في اتنين جنب بعض بيبيعوا نفس السلعة و إنت متعرفش حد فيهم.. إيه اللي هيجذبك لواحد دوناً عن التاني؟

طريقة عرض البضاعة "الرصة" و طريقة مناداة البائع على بضاعته.. و شعراء العرب بالتحديد كانوا مميزين بدة.. و دة أول الخيط.. هنا إحنا بنتكلم على عنصرين مهمين.. عنصر المحتوى Content و هي الكلام الجذاب اللي بيلفت انتباه الزبون.. و عنصر التصميم البصري Visuals and Graphic Design اللي بيشد العين.

الموضوع تتطور بالتدريج.. و مع ظهور و تطور كل اختراع بيجتمع حوليه ناس كتير.. دايماً أصحاب السلع و الخدمات بيتنافسوا إن الناس تشوفهم و تعرفهم.. من قبل ما الطباعة تظهر.. لحد الجرايد و المجلات.. و الراديو و التليفزيون.. لحد المواقع الإلكترونية و من بعدها ال Social Media.. لحد ما نوصل لعالم meta و اللي بعده و اللي بعده.. في النهاية كلها قنوات.. ناس كتير ملمومة حوليها.. و صاحب السلعة بيستغل اللمة دي.

ادراكك لدة بيخليك كمسوق فاهم و مش مرتبط بس بقناة محددة.. يعني لو منصة كل شغلك معتمد عليها.. خلينا نقول فيسبوك.. و جه فيسبوك دة اتلغى أو راحت عليه.. اللي هيستمر هو الشخص اللي فاهم عقيدة شغلانته كويس.. الفكرة.. أما الأدوات فكدة كدة هتفضل تتغير.

كلامنا عن ال social media marketingلسة مخلصش.. و لسة هنتكلم عن ال content و ال Visuals و ال media buying.. بس عاوزين نعرف رأيكم.. بتشوفوا الموضوع إزاي؟ و هل دخول ناس مش مختصة الشغلانة أثر عليها ولا لا؟ يا ريت نعرف رأيكم في ال comments.