مطاعم الفنانين هي سلسلة.. بتتكلم عن المطاعم.. بس مش عن مطاعم الفنانين.. بتتكلم عن التسويق للمطاعم.. طب إيه علاقة الفنانين بالموضوع؟
خلينا نشوف الحدوتة.. و عشان منبقاش بنعمل دعاية لحد هنستخدم أسماء مستعارة
دلوقتي عندنا شخصين..
حسين شخص عادي جداً.. شغال في مجال المطاعم و تدرج فيه لحد ما ربنا كرمه و قرر يفتح مطعم لوحده
فؤاد البنداري على الجهة الأخرى هو فنان متوسط الموهبة.. ربنا كرمه في آخر كام سنة و عمل أعمال كتيرة و البلية لعبت معاه.. و بما إنه مدرك إنه دول اليومين بتوعه و يا إما يعملهم يا إما هتروح عليه فقرر إنه يفتح مطعم يستثمر فيه فلوسه.
دول النموذجين اللي بنتعامل معاهم.. تمام؟ و نفترض إن الجودة بتاعتهم هم الاتنين بنفس الدرجة.. تفتكر مين فيهم مطعمه هيكون ليه زباين أكتر؟
أعتقد الأغلب هيتفق معايا إن مطعم الفنان فؤاد البنداري هيكون ليه جماهيرية أكبر.. على الأقل في مرحلة انطلاق المطعمين.. و السبب هو اسم فؤاد البنداري.. فؤاد البنداري is a brand.. ودة هيساعد بدرجة كبيرة جداً و بأقل مجهود في التسويق.
لو جينا بقى نتكلم بشكل عام في ضوء فهمنا للقصة دي فهنا ندرك قد إيه التسويق مهم لمطعمك.. و أهميته لا تقل عن أهمية جودة المنتجات اللي بتقدمها في مطعمك.. و بما إن التسويق فن فبالتسويق الصح.. مطعمك هيبقى ولا مطاعم الفنانين.
كده اتكلمنا عن السبب اللي ممكن يخلي مطاعم الفنانين في بدايتها تتفوق على مطاعم تانية حتى لو كانوا بنفس الجودة.. و أقولك على اللي أكتر كمان.. دة ممكن تكون الجودة أقل و في مرحلة الانطلاق مطاعم الفنانين تنجح أكتر.. ولو لفترة صغيرة.. و دة بياخدنا لسؤال مهم.. هي إيه عوامل نجاح المطعم؟
عوامل نجاح أي خدمة أو منتج كتيرة جداً.. بس لو حبينا نختصرهم في كلمتين بس نقدر نقول (الجودة و التسويق) و الاتنين يعتبروا معادلة مينفعش طرف فيها يختل.
جودة الخدمة شيء لا بد منه.. خاصة في ظل التنافسية الموجودة.. هتقدم خدمة أو جودة أكل مش على المستوى.. في أكتر من بديل ليك.. أسعارك مبالغ فيها بالمقارنة بجودة الخدمة.. هلاقي بدائل كتيرة و أرخص و ممكن تكون جودتها أفضل.. تعامل الموظفين عندك يفتقر لأصول الضيافة و محرمين البسمة على وشهم.. هلاقي محل تاني شامي بيقدملي الوجبة و يقولي بعدها "صحتين عقلبك"
طيب كدة الجودة و تمام.. خلصنا منها.. نيجي للتسويق بقى.. و بالمناسبة.. شغل التسويق عند الخواجة بيتدخل في كتير من تفاصيل الخدمة و المنتج نفسه.. بس ما علينا.
النقطة دي دايماً بنشير ليها في كل كلامنا.. و هي من مبادئ التسويق.. جودتك لوحدها مش كفاية.. لا بد منها.. لكن جودة عظيمة و محدش يعرف عنها حاجة يبقى بضبط كأنها مش موجودة تماماً.. أصل على رأي المثل.. "أنا كدة استفد إيه؟!"
و بالتالي.. ضروري ولابد و حتماً تكون مهتم بالتسويق عشان الناس تعرف إن عندك خدمة كويسة و يقرروا ييجوا عندك و يجربوا من أكلك.
بس السؤال يا ترى.. هل كل أساليب التسويق واحدة؟ يعني مطعم أكلات شعبية في الناصرية هيتبع نفس استراتيجية التسويق لمطعم سوشي في التجمع الخامس؟
اتكلمنا المرة اللي فاتت عن عوامل نجاح أي مطعم.. وهي الجودة و التسويق للجودة دي.. ووضحنا إن الاتنين مينفصلوش عن بعض.. وناقشنا بعض الملامح العامة للنقطتين دول.. و بما إن جودة المطاعم مش حتتنا فنتكلم عن التسويق للمطاعم بالتفصيل.
لو انت لسة بتبدأ مطعمك فلازم تذاكر.. أو على الأقل تبص على منافسينك.. بيعملوا إيه؟ بيعملوه إزاي؟ أسلوبهم عامل إزاي مع العملاء و إيه الطريقة اللي بيخاطبوهم بيها على ال social media.. طب بتجيب معاهم ولا لأ؟ و إيه أكتر طريقة جابت معاهم؟ و إيه الطرق اللي مكانتش مناسبة أو فعالة بالنسبالهم؟
مش بنقولك تسرقهم.. بس دراستك لأساليبهم التسويقية هتكون مؤشر ليك.. لأنهم في النهاية منافسينك.. و زباينك المحتملين هم في الغالب نفس زباينهم و بالتالي معرفتش بالأساليب اللي كانت مؤثرة ليهم هتساعدك تكتسبهم.
طيب و بعد ما أذاكر منافسيني.. أعمل إيه؟
ذاكر زبونك.. حط نفسك مكانه.. يعني مثلاً لو انت بتتعامل مع محل فطير و بتطلب منه كل فترة يوم خميس كدة فطيرة مشكل لحوم و واحدة بغاشة.. و جيت تفتح الصفحة بتقلب في المنيو و انت بتدعي الأسعار تكون مزادتش لقيته عامل عرض الويك إند هتتبسط ولا لأ؟ أنا شخصياً هتبسط و من موقعي هذا بناشد عم عبده الفطاطري وهو عارف نفسه إنه ياريت يعمل عرض الويك إند.
كمان متحبش مثلاً تلاقيه منزل فيديو وهو بيعمل الفطيرة السجق و هو بيأكد إن السجق بلدي و الجبنة الكيري هي كيري بجد؟ كلنا نفسنا في دة.. كل دة و أكتر هتعرفه لما تجرب تحط نفسك مكان زبونك.
طيب حطيت نفسي مكانه و دلوقتي تحمست و قررت أركز في التسويق لمطعمي.. قولي بقى على شوية أساليب تسويقية أعملها.
コメント