تحليل اعلان اتصالات رمضان 2023.. سابق بكتير

كلامنا النهاردة عن للإعلان اللي كان حديث السوشيال ميديا.. وهو إعلان اتصالات.. سابق بكتير

طيب مبدئياً كدة فالإعلان إنتاجياً قوي.. شغل lighthouse film

ودة المعتاد منهم.. إخراج مروان حامد.. مدير التصوير توماس بولينس

مونتاج أحمد حافظ.. ألوان أحمد عصام.

Locations

بصرياً جذابة.. معدات وتقنيات مكلفة

أبطال الإعلان نفسهم.. خالد النبوي.. ويجز.. عمر خيرت.

الخلطة لوحدها تبيع.. عناصر تشيلك الإعلان من غير ما نتكلم عن الفكرة نفسها..

بصرف النظر إني ممكن يكون عندي اعتراض على اختيار فريق الأهلي و نور الطيب

اللي يعرفني فأنا ولا زملكاوي ولا أهلاوي.. وأنا بشوف دة business يعني فلا يعنيني الموضوع ككل

لكن الأهلي خسران الدوري آخر سنتين ورا بعض.. ونور الطيب مش المصنفة الأولى عالمياً.. و سبب الاختيار إنهم sponsor للاتنين مش أكتر

نيجي بقى للموضوع إبداعياً.. بدون أي قسوة.. فالإعلان دة هو الأضعف إبداعياً بين الكل إعلانات شركات الاتصالات.. إلا لو كان هدفهم زي رسالة الإعلان.. إنهم مش عاوزين ينافسوا حد وعاوزين ينافسوا نفسهم.

أكتر من 80% من أي مشاعر إيجابية ممكن أي متلقي يحس بيها تجاه الإعلان دة ترجع لموسيقى عمر خيرت

موسيقى عمر خيرت عندها القدرة على إضفاء قدر من العظمة على أي مشهد حتى لو كان ضعيف

لو جربت تحطها على أي حاجة هتديك تأثير مشابه..

لكن المشكلة إن حتى موسيقى عمر خيرت مش جديدة.. المقطوعة نفسها هي مقطوعة مسلسل العميل 1001

نيجي بقى لإعلان بورش اللي الناس لقيته وقالتلك دة مسروق منه.. بصرف النظر عن مدى تشابه الإعلانين.. و دة للأسف ناس كتيرة بتعمله.. فأنا مش شايف إن الفكرة بشكل عام جديدة.. أو بمعنى ادق فهي مش فكرة أصلية اخترعتها بورش.. إنك لما تيجي تنافس نافس نفسك.. وإلا يبقوا هم واخدين الفكرة من فيلم Black Swan.. الفكرة في سطر أي حد هيعوز ينفذها هينفذها بنفس الطريقة و الأسلوب.

يمكن المشكلة بس إن الأسلوب دة في الشغل كان موجود من زمان و في جيل متعود عليه.. إنه ياخد إعلان أجنبي وينفذه في مصر.. ودة كان مفهوم زمان لأن كل واحد فيهم كان فاكر إن هو الوحيد اللي عنده وصلة نت.. لكن دلوقتي ال social media بقت تحط الصناع في موقف محرج.. وحفلة بقى.. الناس بتحب الحاجات دي.. Social currency.. أو موضوع يقدروا يفتحوا بيه كلام مع الناس

اللي هو.. شوفت إعلان اتصالات الجديد.. طلعوا سارقينه من برة.

الإعلان متقدرش تقول عليه إعلان سيء.. لكنه إعلان ضعيف إبداعياً.. فيه استسهال اللعب على عناصر معينة معانا.. فليه نجتهد و نطلع بفكرة و نوجع خلايا مخنا.. مش لازم.. حتى مش لازم نعمل مزيكا جديدة.. نكلم عمر خيرت يطلعلنا حاجة قديمة من الدرج عنده و كدة كدة الناس بتحب عمر خيرت و مش هتركز.. حتى مثلاً مفكروش إنهم يعملوا تراك حلو كدة.. ويجز مع موسيقى عمر خيرت.. بنفس المضمون.. بنفس الرسالة عادي.. بس تحس إن في شوية خلايا مخ اتحركت من مكانها عشان تحلل المرتب حتى.

وبالتالي ممكن الجماعة في FP7 يقعدوا مع بعض شوية بس كدة.. يعيدوا تقييم الموضوع.. وعفا الله عما سلف.