إنك تعمل إعلان ب mega star زي محمد صلاح دي مش حاجة سهلة
لأن الأمر هنا مش بيكون مجرد التعامل مع نجم أو Celebrity.. عنده طلبات وشروط
إنت في الحالة دي بتتعامل مع مؤسسة.. في أفراد بتديرها و بتكون حريصة عليها و على شكلها
بجانب إن المحددات و المحجمات بتكون كتيرة جداً
عوامل الوقت و طبيعة المشاهد اللي هتتعمل ومدى خطورتها
كل دي عوامل بتتطلب مجهود مش سهل تماماً من ال creative team اللي شغال على الموضوع
و دة اللي نجح فيه فريق King Tut في إعلانهم الأخير مع فودافون و محمد صلاح
إعلان vodafone الجديد هو بمناسبة إن الشبكة بقت الدبل في مصر
و مع بداية الإعلان بنعرف إننا في إنجلترا.. في مكان تابع لفودافون
في أجتماع بنشوف فيه محمد صلاح و مدير أعماله رامي عباس و فريق فودافون و المدير و المخرج حسام الحسيني
بيبدأ المدير يشرح لمحمد صلاح الموضوع و صلاح بيتحمس إنهم يعملوا إعلان جامد
لحد ما حسام الحسيني بيبدأ في ال creative presentation بتاعه
و اللي بيوتر محمد صلاح و مدير أعماله فبيقرروا إنهم هيخلعوا بشياكة
و في ظل تمسك المدير و باقي الفريق بمحمد صلاح و رسالة إن الشبكة بقت الدبل توصل للناس من خلاله.. بيقترح عليهم إنهم يدوا جيجا إنترنت للناس ببلاش.. فالمدير يرد و يقوله طب ليه متبقاش تيرا؟!
و هنا بيقدر يخلع محمد صلاح في ظل إحباط من المخرج حسام الحسيني
دة باختصار كدة ملخص الإعلان
الإعلان زي ما قولنا من إبداعات شركة king tut و هم من الناس القليلة اللي لو سمحولي بحس إنهم فاهمين شغلهم كويس أوي.. و بيعملوا شغلهم حلو أوي
إنتاجياً فالإعلان من تنفيذ شركة Lighthouse Film
و شركة Mac Cow Films في الأجزاء اللي اتصورت في إنجلترا
مدير التصوير فيكتور كريدي
الألوان لكريم ميرا
مونتاج أحمد حافظ و اللي كان عامل برضه إعلان We اللي اتكلمنا عنه المرة اللي فاتت فلو مشوفتوهاش تقدروا ترجعوا تشوفوها بعد ما تخلصوا الحلقة دي
و أخيراً.. فالإخراج لمحمد حمدالله
(هنا سأسكت قليلاً)
الحقيقة إن الكلام عن محمد حمدالله يستحق حلقة لوحده.. لأكتر من سبب
أولاً لأن محمد حمدالله بدون مبالغة هو واحد من رواد صناعة الإعلانات في مصر
يكفي إني أقولك إني مخرج و صانع بحجم علي علي كان بيحكي إنه لما نزل مصر و قرر يشتغل في مجال الإعلانات.. كان بيذاكر محمد حمد الله
و اللي يخلي مخرج كليبات و إعلانات بحجم حسام الحسيني ميجدش أي مشكلة إنهم يجيبوه يمثل و كأنه مخرج الإعلان.
ثانياً.. لجودة المنتجات اللي بيقدمها.. على المستوى الشخصي يكفي إني أعرف إن الإعلان دة من إخراج حمدالله فتتحول نظرتي من نظرة نقد لنظرة تحليل.. محاولة فهم الراجل دة بيعمل إيه و بيعمله إزاي
و ثالثاً.. لأنه شخصية غامضة.. صعب تلاقي عنه حاجة.. صعب تلاقيله لقاء أو حوار أو تواجد حتى على ال social media بمختلف منصاتها.. و دة بيزود من فضول الرغبة في معرفة ما هو أكثر عن شخصية زي دي.
و بالتالي كل الكلام دة و أكتر يستحق حلقة لوحده
نرجع لإعلاننا
واحدة من الحاجات اللي بحبها و بتلفت انتباهي في أي Campaign جديدة بتنزل
إنها مش بتكون مجرد مجموعة إعلانات قصيرة بحواديت مختلفة بتنزل و بتخدم على نفس ال concept
طبعاً دة حلو و معنديش مشكلة فيه.. بس مؤخراً بقوا يعملوا حتة الإعلانات المكملة لحدوتة الإعلان الأساسي
الإعلان نفسه بيبقى عبارة عن حدوتة طويلة نسبياً.. على سبيل المثال فمدة الإعلان دة 3 دقايق و 17 ثانية.. و هي مدة مش قصيرة
بنحكي خلالهم حدوتة
و بعدين نعمل إعلانات متشعبة منه.. زي إن حسام الحسيني بيقترح على الفريق قبل ما صلاح ييجي فكرة أغنية للإعلان
زي إنه بيحاول يتصور معاه في الكواليس
أو إننا نعرض ال storyboard presentation اللي جوا الإعلان على إنها إعلان لوحده و نخلي ال VO بتاع إعلان بيريل هو اللي يقدمها.. و اللي حاولت أعرف أو ألاقي اسمه بس حقيقي ملقتهوش.. ولا قدرت أتوصل للي رسموا الرسومات دي.. بس في بعض الأقاويل بتقول إنهم معمولة AI
طريقة تقدر من خلالها تستغل و مش بس كدة.. لأ دة إنت كمان تغذي بيها موجة النجاح اللي بيعملها الإعلان
نقطة كمان تخص الإعلان دة بالتحديد وهي إنك تقدر تطلع من لاعب كورة و محمد صلاح بالتحديد بحاجة دمها خفيف و مش مفتعلة.. لأن دي بتكون المشكلة مع أغلب لاعبي الكورة اللي بيمثلوا أو بيعملوا إعلان.. بيكون باين عليهم الاصطناع.
إنك تقرر تستخدم شخصية رامي عباس مدير أعمال أو Agent محمد صلاح دي حاجة لطيفة و تضيف بعد دمه خفيف و واقعي في نفس الوقت.
مجملاً الإعلان معمول حلو جداً.. سواء على المستوى الإبداعي أو التنفيذي أو التسويقي.. و مليش دعوة بالشركة نفسها.. أنا في النهاية بحلل المنتج الإبداعي.. سواء خدمتهم وحشة أو حلوة فدي زاوية تانية أنا مش أهل لتقييمها.
قولولي رأيكم في الإعلان.. و سؤال أخير.. إيه أكتر إعلان لمحمد صلاح علق معاكم الفترة الأخيرة؟
مستني رأيكم في ال comments
Comentarios